Monday, September 5, 2016

North Dakota and Irish Independence

NORD DAKOTA E U LIBE DE EIRE

Pan ra gene proto a landa Eire per tri Eire civi. U landa England pa mega-tem habe un arki supra Eire, tem sti plu religio disputa, e tem gene plu Eire juve andro homo plu soldata pro auto plu milita. Un Eire civi Michael Doheny ergo pro u milita kontra England anua 1848. U-la milita habe u mega no-sucede. Anti-co bi hetero Eire-pe, John O'Mahoney e James Stephens volu auxi a Doheny. Anti-co England gene u ski de mu. Kausa-co pan mu sti fugi ad u civita Neo York in USA. Un ultima pe ki a la anua 1858. Anua 1859 mu akti auxi de proto u neo socia-fa, mu dona u nima de un Eire lingua verba a, FENIAN [soni: fInian]. U-ci tri pe akti u skema de u neo mode de gene libe por Eire: milita kapti u landa Kanada, alo posi plu mero de id, e komanda; England dona libe ad Eire kambio id. Multe Eire-pe in USA sti unio ko mu.

Anua 1861 un in-landa milita in USA gene proto. U-la akti anti u skema de tri-ci Eire-pe. Kron proto, mu dice u komanda; pan Eire-pe ne akti in u-la milita. England tem proto de milita dona auxi a plu anti-krati stato. Posi plu Eire-pe akti in milita, kausa mu este; u milita es un okasio de milita anti England. Homo-co un USA-Eire kanta, "Na Akti pro Parenta-Fratri Sam," dice:

Si John Bull akti anti na, an sura gene suferi,
Kausa plu Eire volu-pe fu dona ad an diaboli-ma.

(John Bull es un England homo de un USA Parenta-Fratri Sam.)

Plu Eire-pe face un arme Kolumni 69. O'Mahoney gene es u duce-pe de id. Plu Eire-pe habe plu insigni de Eire. Anti-co plu hetero Eire-pe akti milita pro plu anti-krati-pe, kausa-co in u-la milita plu Eire-pe plu-kron akti anti plu Eire-pe. Akorda-co u milita sti; plu Eire-pe gene tekno de milita.

Anua 1862 Doheny gene morta. U-la sti u skizo inter plu Fenian-pe. Plu pe volu dura u milita in USA, plu hetero pe in Eire.

U in-landa milita de USA gene fini anua 1865. Anua 1866 plu Fenian-pe sti prepara se tende kapti u nesia Kampobelo de Kanada, proxi a stato Maine. O'Mahoney akti duce de plu Fenian-pe. Anti-co England pre habe ski de u-la tenta, e bali plu milita navi a la. Un USA milita navi kapti un arma-stora navi de plu Fenian-pe, un OCEANI SPRE. Plu Fenian-pe dona se ad USA. O'Mahoney este fobo de u-la acide, e face u decide; an fu akti u valuta kolekti pro plu Fenian-pe vice milita.

Po bi mensa, un hetero duce-pe de plu Eire-pe in in-landa milita, John O'Neill, sti u milita anti plu Kanada-pe proxi ad u forta Erie. Plu Kanada-pe ne habe u pre-ski. Kausa-co plu tekno Fenian-pe facili gene u vikto. Anti-co USA bali u milita vapo-navi MICHIGAN, e plu Fenian-pe dona se ad id. Un USA preside-pe Andrew Johnson ne volu milita anti Kanada, e bali plu soldata ad u proxi civita Bufalo, tende apo pan fusili arma de plu Fenian-pe. Kron anua 1870, plu plus Fenian-pe akti u milita proxi ad u Kanada civita Ottawa, e pre-kron gene u vikto, sed nece cede se ad USA kausa minus de arma-ma.

Anua 1871 u milita moti se ad uest. Un Eire-pe, O'Donaghue, volu; u demo METÍS, u ge-mixa demo ex plu Kanada-pe e plu Indiana-pe, akti milita kontra Kanada. Mu sti unio se ko O'Neill, tende akti milita kontra u Kanada pusi civita Pembina. O'Neill ko 30 Fenian-pe ki kontra u-la civita, tem volu; plu Metís-pe fu dona auxi a mu. Pan-la Fenian-pe ne habe u ski; u pre anua, plu USA milta tekno-pe pa akti u decide; u civita Pembina faktu es in USA per tri kilo-metra, e; plu Metís-pe pre oligo di pa gene u paci akorda ko Kanada. Kausa-co plu Pembina civi pre ski de u tenta, e multe mu pre ki ex la. Kausa-co plu Fenian-pe facili kapti u civita. Plu USA soldata tako ki a la, e kapti minus milita O'Neill ko 10 Fenian-pe. U judika-pe dona libe a mu po mikro tem.

Multe Eire-pe ne pa du eko in Nord Dakota. Mu dice; u-ci es, kausa plu Eire-pe ne habe ski de ergo plu kulti-lo de u-ci frigi landa. O'Mahoney gene morta anua 1877 in u civita Neo York. O'Neill gene morta anua 1878 in u stato Nebraska- u civita la habe an nima. Po dona auxi de u plus minus-sucede milita in Eire anua 1867, Stephens sti fugi a landa France, e homo u pove-pe gene morta la anua 1902. England lice; O'Mahoney e Stephens gene in-tera in Eire.

No comments:

Post a Comment