Saturday, September 24, 2016

INDUSTRI 14

14. U STORI DE MIKRO JAKOB

Pre mega tem, u bi-pali navi INDUSTRI pa ki de u-la navi asilu ad u tele landa.  Id plus re-ki ad u-la navi asilu, e apo pan kali ra, id pa moti a la.

Ad u kron u maxi gero an-fili de u kapitana Solomon habe 12 anua, u navi pre sto ki ad u-la mikro civita.  Id kron ki de u navi asilu in u civita Boston.  Plus pan hetero navi, u kapitana Jonatan e u kapitana Jakob habe, du ki de u-la navi asilu topo civita Boston.  U kapitana Solomon du qestio se; an fu akti qo de u maxi gero fili.  An du kogita de u-la u mega tem.

Kausa-co an ki ad u negoti-do de u kapitana Jonatan e u kapitana Jakob kron uno mana.  La an detekti u kapitana Jakob.

U kapitana Solomon dice: “U boni mana a tu, O kapitana.”

Kron u kapitana Solomon ne exakti ski u mode, an proto dice u ra, an debi dice.

U kapitana Jakob dice: “Ben, kapitana, u turba es qo?”

“Tu habe u ski; mi habe un an-fili, mi maxi gero fili, qi habe 12 anua.”

U kapitana Jakob dice: “Qe tu ne fu habe an tem u seqe viagia?  Na fu face an u ju-an de u kapitana-ka.  Plus mi habe u certa idea— anti mi ne ski; si Loisa fu este hedo de u-ci.”

U kapitana Solomon dice ad an u gratia, e ki de la.  Po-co u kapitana Jonatan ki in la.  U kapitana Jakob dice ad an de u-la fili de u kapitana Solomon.  U kapitana Jonatan sti u puta; es u boni ra; face an u ju-an de u kapitana-ka.  Po-co u kapitana Jakob dice ad u kapitana Jonatan de un idea, an habe, qi es; bali plus auto ju-an kon u kapitana Solomon.

An dice kron fini: “Ben, Jakob, tu posi habe korekti.  An fu habe u ko de Sol.”

U kapitana Jakob sti prepara se de ki e vide Loisa, kausa Loisa es in u-la mikro civita.

Kron mu habe ni plu feru-via movi-vagona, ni plu feru-via.  U kapitana Jakob prende u vesti-va, e ki ad negoti-do de plu equs-vagona.  An ki a supra de u vagona, e sedi post un ago-pe.

U vagona es u tako vagona.  Id habe tetra ge-liga equs.  Mu ki dia plu mikro civita, e uno-kron sto ki, tende cepti u viagia-pe.


Plu ergo-pe tako apo plu equs.  Plus-co plu hetero ergo-pe sti ki a la plu fresc equs.

Mu nece cirka tri horo de ki de civita Boston.  U kapitana Jakob tem habe holo no-flaci e ki-debili kausa mega-tem sedi.  Plus-co an habe poli tera farina.  Loisa este mega subito, kausa fe ne ski; an ki de la.

Loisa dice: "Uno-ra habe mali, qe?"

U kapitana Jakob sti ridi.  "Qe, tu ne este hedo de vide mi?"

Loisa reakti: "Mi doxo; debi es uno importa ra."

Po-co an dice a fe de u kapitana Solomon kon an fili Sol, plus an doxo; fu es u boni oportuna de bali plus mikro Jakob.

Loisa dice zero mega-tem, tem simpli sedi e skope dia u fenestra.  Mikro Jakob subito sti dromo a la.


U kapitana Jakob dice: "Jakob, qe tu fu este hedo de ki a natio India e itera a ci in u navi INDUSTRI?  Sol fu ki."

Mikro Jakob dice: "Si tu este place, senior, mi fu este hedo de puta de u-ci mikro tem."

U di veni, kron u kapitana Jakob fu ki itera a civita Boston.  An pa dice plus zero a mikro Jakob de u viagia ad u natio India.  An dice: "Ben, Jakob, ad u natio India, alo no?"

Mikro Jakob reakti: "Si tu este place, senior, mi doxo; mi debi ki."

U kapitana Jakob ki de la.

U kron; mu nece ki ad u civita Boston in vagona, veni.  Kausa-co mu ki, Loisa ko mikro Loisa e mikro Jakob.  U seqe mana, pan mu es epi u navi.  Plus u kapitana Jonatan sta la.  An dice u saluta a mikro Jakob forti poli kron, e dice ad an; an nece kura skope, tende, po an re-ki a ci, an pote dice ad an; qe plu ra in u natio India pa habe poli muta.

Po-co pan itera dice u saluta a mikro Jakob.  Pan mu ki a kata per u pedi taba ad u navi asilu, u kapitana Jonatan e u kapitana Jakob.  Anti-co Loisa sto ki, tende dona a mikro Jakob u plus osku.  Po-co plus fe ki a kata.  Po-co plu navi-pe sto liga plu mega korda, qi tena u navi.  Mu sti alti plu veli.  Po-co u navi ki de la.

U-ci es pan-ra.

No comments:

Post a Comment