Sunday, August 21, 2016

INDUSTRI 13

13.  U STORI DE PLU GE-LOSE-PE

Uno-kron pre mega tem, u bi-pali navi INDUSTRI pa ki de u-la asilu kausa viagia ultra u kapo Horn.

U meteo pa habe termo ad u-la oceani mero, u navi ki a.  Kausa-co plu mari-pe ne este hedo de akti poli ergo.

Akorda-co u navi du ki.  Plu navi-pe vide zero ra excepti mono alo bi nesia, qi habe tali tele, tu ne sio ski; mu es tera, si pe ne dice a tu tali, kausa mu sta tele de la ad horizo; lo urani e mari feno habe unio, e lo habe holo nebula e no-klari.

Po-co, uno mana, exakti kron un heli leva se, u navi-pe epi plu veli baci sti voci, “Tera, O!”

U kapitana Solomon gene u tele-skope-ru, e sti skope.  An simpli pote vide u supra de u nesia de pedi-lo.

Tem mu du skope, mu vide; fumi ki de nesia supra, plus u-la fumi gene ma e ma densi.  Ko-co ni u kapitana Solomon ni pan navi-pe ski; u-la es qo ra.  Oligo mu este; u-la es fumi ex vulkano, kausa un holo nesia feno es u vulkano.

U kapitana Solomon dice u komanda; pe sti muta plu veli, tende u navi ne fu ki ad ante, sed sta ad iso loka.  Mu lase a mari u remi-navi.  Plu navi-pe ki in id, plus u kapitana-bi ki in id po mu.  Mu ki de la per plu remi.

Kausa u kapitana Solomon mega-tem ne pote vide mu, an este turba.  Anti-co po mikro tem u kapitana-bi ki ad un arena-lo, u kapitana Solomon pote vide an a.  An akti plu oscila per un extra-ve, an pa liga ad u remi.



Es u mega tem, pre u remi-navi ki a la de u-la nesia.  U remi-navi ki a proxi.  Mu vide; es in id deka andro, qi ne pa es in mu navi, e; oligo ex mu habe a se plu paleo vesti kun poli fora, e; oligo ex mu habe a se zero vesti.

U kapitana-bi itera ki a tera per u-la remi-navi.  Po hemi horo, plu navi-pe vide; u remi-navi itera ki a mu, plus, anti es in id simpli 12 andro, id basi ki in hidro, homo id habe u gravi kargo.

Uno andro, qi pa gene salva, dice: “Plu testudo.”

Po-co u kapitana Solomon sti u labia ridi, kausa plu testudo, an pa dice, ne es plu mikro testudo, tu ski, sed plu fo-mega mari testudo.  Plu-ci testudo habe boni de vora.

Po-co u remi-navi ki para la.  Penta navi-pe ki ex id.  Po plu hetero navi-pe liga u korda ad u veli-baci fini, mu liga u korda fini a mo testudo, e leva id a pedi-lo.  Ko-co mu leva a supra plu resta testudo.

Uno navi-pe proto dice ad u kapitana Solomon un histori :

Mu es plu England-pe, qi pa ki per u mega navi de u civita Liverpool pre proxi bi anua.  Uno noktu, u navi pa bate anti u korali-lo, qi sta solo in oceani, ge-kripto, e sta proxi infra aqa.  Kron di lumi veni, un oceani ki supra u-la navi.  Mu vide; id gene frakti a bi mero.  Mu ki per plankto a ci e la tem proxi bi setimana, e tem ne ski; mu es a qo loka, alo mu ki a qo loka.  Po oligo plus di, mu vora pan sito, mu pa habe.  Plus-co mu ne habe sito tem proxi mo setimana.  Anti-co, uno mana, mu vide uno-ra, qi feno es tera, e sti direkti ad id.  In u-la nesia, mu detekti plu kokus dendro e plu banana fito.  Mu gene u piro per frika bi baci anti alelo, qi es u no-facili mode.  Per-co mu sucede de eko epi u-la nesia tem holo anua.  Zero navi ki a vista.  Uno mana, mu vide u navi, qi du ki ma e ma proxi a mu nesia.  U navi, mu pa vide, es INDUSTRI.

Po u-la andro fini dice, u kapitana Solomon dice; an este hedo de u-la; an pa ki a la per acide, e an fu duce pan mu a landa India, e de India mu fu pote gene u viagia ad auto eko-lo England per uno England navi.

U-ci es pan-ra.

No comments:

Post a Comment