Saturday, February 20, 2016

INDUSTRI 9

9. U STORI DE PLU REPARA

Uno di pre mega tem, u bi-pali navi INDUSTRI resta ad u-la navi-lo.  Mu pa apo plu kargo, id pa moti ab u tele landa, e moti mu ad u mega stora-do, u navi cefa Jonatan e u navi cefa Jakob habe, plus plu ra pa gene moti ad u domi de u navi cefa Jonatan.

Kron u navi cefa Solomon puta; u navi debi habe plu neo ra, pre id proto u plus viagia, kausa oligo veli ne habe tali forti, de mu debi habe, plus oligo korda pa gene tali mega uti, mu proto habe plu skizo e gene habe paleo.  Kausa-co an ki a plu veli face-pe, e dice a mu; an volu; mu ki a la, e metri in u navi de plu neo veli.  Plus an ki a plu navi pali-pe, e dice a mu; an volu; mu ki a la, e apo pan veli baci de u navi.

Tem plu veli-pe e pali-pe habe aktivi kausa face plu neo ra pro u navi, u navi cefa Solomon komanda; mu duce id ad u mari feru-via.  La es u mega tena-ru ko plu ciklo, qi ki epi u feru-via ad-in aqa.  Mu pote trakto id ex aqa per plu mega korda.  Po plu ergo-pe sufici liga u navi ad id, mu sti; bi equs ki peri e peri ad u proto de u-la feru-via, e strepto u korda veri tardi.  Po-co plu ergo-pe pote skope u navi funda, e repara ad ali-ra, qi nece gene plu repara.  Po-co mu lase u navi itera ad aqa.  Po-co plu pali-pe ki a la, e sta plu neo pali, mu pa face, a mu loka, plus mu moti a supra plu veli baci.

Tem plu pali-pe du ergo, u navi cefa Solomon komanda; plu ergo-pe moti plu kargo in u navi.  Plu ergo-pe uti plu kareta, e proto ki uno po hetero a supra longi u klina taba mono, tem pulsa plu ple kareta, e po u-la ad infra longi u bi, tem trakto plu vaku kareta po se.  Po-co plu veli-pe ki a la ko plu veli.  U navi cefa Solomon logi; u navi habe pan prepara de ki de u plus viagia, kron an fu gene plu navi-pe, e kron an habe plu vora, e aqa, mu bibe.

U-ci es pan-ra.

No comments:

Post a Comment