Sunday, September 20, 2015

INDUSTRI 3

3. U PROTO-KINE STORI

Ante mega poli anua, tem plu navi pa-du kine a navi-lo, u certa andro pa face u navi stru-lo para u-la lati fluvi.  Ad u-la stru-lo, an face u bi-pali navi INDUSTRI pro u kapitana Jonatan e u kapitana Jacob.

Plu ergo-pe gene plu mega xilo bloka, qi es plu dendro, mu pa face tetra-gono e glisa.  Mu sti kumbe mu a bi seri infra bi latu de INDUSTRI.  Mu dona a mu u nomina "via."  Mu es homo u mega xilo feru-via ab ante de INDUSTRI ad hidro.

Po plu via gene fini, plu ergo-pe prende plu mega bloka, e moti mu ad-epi plu via, e forti liga mu ada alelo.  Mu fu glisa a kata ko navi, longi u-la mega xilo via.  Po-co mu moti  plu brevi bloka orto epi plu glisa via a bi latu de nav INDUSTRI.  Mu liga plu taba a latu de navi, tende tena plu orto bloka.

U stru-lo cefa dice, mu moti u longi baci in pali fora de navi INDUSTRI.  An sti; u sti-kine fu es u seqe di.

Kron es proxi ad u kron de sti-kine, es tali poli homi la; feno es zero civi, qi du resta in civita.  U kapitana Jonatan e u kapitana Jakob ultima kine a la, plus Loisa, u fe-fili de kapitana Jonatan.

Kron u cefa leva u manu, panto homi subito veri sto kine.  Plu ergo-pe apo per bate plu ultima ra, qi tena u navi la.  U kapitana Jonatan kron dice a fili Loisa: "Imedia, Loisa."

Loisa moti ad ana u botilia ko vini, e forti bate u supra mero de navi ante.  Fe forti iso pote dice: "Mi dona a tu u nima INDUSTRI!"

U cefa moti a supra longi u falsi veli-pali un insigni-te.  Id lose plu plika, e oscila se in venti.  Id es u longi, leuko insigni-te ko ciano margina, plus epi id per plu ciano litera es u verba "INDUSTRI."

Per tali mode, un insigni-te du oscila, tem u navi du glisa ko ma e ma tako.  Panto homi du voka, a-kron id bate un hidro ko fo-mega SPLASC, e bali plu hidro mero ad ana.  Po-co id sto kine, kausa es u korda, ge-liga ad id per fini e per proto a mega xilo bloka.  Plu ergo-pe iso-kron trakto per u-la korda.  Mu sti liga id a navi-lo per plu mega korda.

U-ci es panto-ra.

Saturday, September 12, 2015

INDUSTRI 2

2.  U FERU-PE STORI

Ante mega poli anua, tem plu navi pa-du kine a navi-lo, u certa andro pa proto face u navi stru-lo para u-la fluvi.  Kron mono, an pa face u feru-do a mono gono de stru-lo.  A meso de ergo-do, an face u fumi tubi, qi sta dia stego.  An face bi tetra-gono tabla ex plu brika.  Bi tabla habe u baso topo a supra, homo u kratera.

Tem plu ergo-pe face u bi-pali navi INDUSTRI a stru-lo, u feru-pe gene poli feru pali.  Kron u feru-pe habe prepara, an face u piro in baso topo de piro tabla.  An sti; u fla-me sti fla.  U piro gene termo.  An moti u fini de mega, plati feru pali in piro.  Po-co an moti id a mega forma-ru.  Po-co an auxi-pe sti bate per u mega malea.  U feru-pe moti id in u kratera kon hidro, e tena id la tem minuta, e poste bali id a tera.  Per-co mu face panto liga-ru, qi tena plu korda, e sti sta bi pali, e sti liga u direkti-ru a navi.  Pro ankira katena, u feru-pe gene ciklo feru de meso metri.  An sti kurva panto katena mero, e liqi bi fini ad alelo, tem kura akti; u-ci ne sti cinera u feru, e sti debili id.  An face tri ankira katena: mono singu ankira e mono plus.

Un ergo de feru-pe pro bi-pali navi INDUSTRI habe ple.  U feru-pe este hedo, kausa an habe u ski; panto id habe boni.

U-ci es panto-ra.