Sunday, August 23, 2015

INDUSTRI 1

PLU NAVI STORI DE U BI-PALI NAVI

I N D U S T R I

ex John William Hopkins

1. U stori de u navi stru


Pa-tem, pa es u lati fluvi, qi du flu ad oceani.  Plus-co para id, es u mikro civita.  Plus-co in u-la civita es u navi asilu, a qi plu mega navi kine ab plu tele natio.  Plus-co u steno strata kine a kata longi u fo-klina buno ad u-la asilu.  Plus-co ali-pe, qi volu kine ad u-la asilu, nece kine topo u-la fo-klina buno longi u-la steno strata, kausa ne es un hetero mode.  U-la fluvi e u-la oceani nu es la, iso mu pa-du es panto-kron, e fu-du es.  Plus-co u civita nu es la.  Anti-co id es u difere civita, de id pa es.

Pre mega poli anua, tem plu navi pa kine ad u-la asilu, un andro mega freqe kine longi u-la steno strata, kausa an amo skope plu navi, qi kine a la, e es proxi a mu, anti an ne habe negoti ko mu.  A fini, an puta; an fu es u navi stru-pe, kausa an pa stude u stru de plu navi, plus an ski u mode.

A fini, po an pa akti u cerka de mega poli topo, an detekti u korekti speci de topo de navi stru.  Id es u mega gramini-lo, holo glabro e plati, para u mega fluvi.

Po-co an proto sti prepara id de face plu navi.  U kaso mono, an face u feru-do topo u gona, qi pa es proxi a via.  Tem-co plu hetero ergo-pe face un instrumenta-do topo un anti latu de gramini-lo.  U mero de u-la instrumenta-do ne habe u mura ad ante, ko plu pali la, tende tena ad ana u stego.  In u mero ko plu mura holo peri id es u furna e u boli-va.  Plus-co ex u boli-va es u tubi, qi kine ex la e dia mura e ad-in u longi, xilo teka.

Uno pa-di, bi andro kine a la, tende dice kon u-la habe-pe.  U mono es u kapitana Jonatan.  U bi es u kapitana Jakob.

U kapitana Jonatan dice:  “Na pa face u decide de habe u navi pro se.  Id fu es u bi-pali navi.  Plus-co na fu dona a id u nima INDUSTRI.  Na volu; tu face id.”

Po-co u-la habe-pe de navi stru-lo sti kla poli ergo-pe, qi ski u mode de stru plu navi.  An bali u numera ex mu, tende detekti plu dendro, qi es u korekti speci.  U numera ex plu dendro habe orto, e u numera kurva.  Plus-co plu kurva dendro es ex panto speci e forma, qi habe korekti de es in navi.

Po-co plu ergo-pe prende plu mega peleki e trans-peleki, e sti ergo de plu xilo bloka de navi meso, tem sti glabro e lustra mu.  U navi stru-lo cefa sti skope, tende gene u ski; u maxi boni topo de stru u meso es qo.

Po-co plu ergo-pe proto ergo ko poli ge-juga bovi.  Kron plu bovi kine a maxi mega bloka de meso, mu sto kine akorda auto volu.  Mu lento trakto id trans tera, a-kron mu kine a topo de navi meso.

Po-co plu ergo-pe habe mega aktivi de sti prepara plu navi “kosta,” plus u poste e ante kolumni.  Mu sti orto u poste kolumni per skeleto ex poli baci, qi tena id.

Un INDUSTRI habe simpli mono pedi-lo topo meso, e bi pedi-lo topo ante e poste, plus u mikro pedi-lo, qi es u simpli tegi trans funda.

Plu taba de extra es plu mega paki taba ex dendro Qerkus, dika homo u ju-an manu habe longi.

Mu face u kapitana kamera e u kuko-ka, e sti tali perfekti un INDUSTRI, de plu xilo-pe pote perfekti id.  Peri u navi es u leuko stria, plus-co in u-la stria es plu melano qadra, tende dona ad id u feno de u milita navi.

Po-co, uno di, kron u navi INDUSTRI habe perfekti, klu a grafo u nima per kriso litera epi poste, u kapitana Jonatan e u kapitana Jakob kine a la, e sti sta para u navi stru-lo cefa, e skope id.  U kapitana Jonatan dice grati a cefa de stru u navi INDUSTRI ko tali boni, e de face tali forti id.

U-ci es panto-ra.

Saturday, August 8, 2015

Justi 2015 Trinity

 / |_| \
|  (^)  |
| (    ) |
 \_,, _/
  /  \
 \__/  (avi Kolumba)

J  U  S  T  I
PER AN FIDO

== 2015 == U Tri-Unita ==

U KREDI DE PLU GE-BALI-PE (Apostola)

Un artikla MONO— de krea

Mi habe u kredi de panto-sankti panto-dina Patri-Teo, u Krea-pe de Urani e Geo.

U-ci habe qo semani?
  Mi kredi; Teo face mi e panto krea-ra.  An dona a mi u soma e psiko, e bi oku e oti, e panto mero, e mi mensa e panto pote.
  Mi plus habe u kredi; Teo nu du tena mi per dona ko poli e panto di plu vesti e pedi-ve, e vora-ma e bibe-ma, e domi e eko-do, e u sponsa e plu fili, e un habe-lo e plu bovi, e panto-ra, mi habe, e panto-ra, mi nece tende tena mi soma e bio, e per du alexi mi anti panto risko, e dona a mi guarda e alexi anti panto kako.
  Teo akti panto-ci, simpli kausa An es mi boni e favo Patri in Urani, e ne kausa mi habe paga alo merito de u-ci.
  Kausa panto-ci, mi debi dona ad An gratia e latri, e servi e obe.
  U-ci certe habe veri.

Un artika BI— de re-merka

Mi habe kredi de Jesu Kristo, An solo Fili, na Kirio, Qi pa gene proto per u Sankti Spiritu, gene nati ex virgo Maria, gene suferi sub Pontio Pilato, gene cide per u kruci-ru, morta e in-tera, e An kine kata a diaboli-lo.  Kron di tri An kine ana ex panto morta-pe, e An kine ana ad Urani, e nu du sedi topo dextra de panto-dina Patri-Teo.  Ex la, An fu re-kine, tende dice judika de panto vive-pe e morta-pe.

U-ci habe qo semani?
  Mi habe kredi; Jesu Kristo, u veri Teo, ge-proto ex Teo pre holo-tem, e plus u veri Andro, ge-nati ex u virgo Maria, es mi Kirio.
  An pa re-merka mi, u ge-lose e ge-judika krea-ra, po dona merka de mi e gene mi ab panto kako, ab morta e ab pote de u Diaboli ne per aureo alo argenti, sed per Auto sankti e fo-valu hema e per minus-etio suferi e morta.
  An pa akti panto-ci, tende mi debi es de An, e habe vive sub An topo Auto regi-lo, e dona servi ad An per holo-tem justi, minus-etio e hedo, exakti per u mode, An kine ana ab morta, e du habe bio e arki holo-tem.
  U-ci certe habe veri.

Un artikla TRI— de sankti

Mi habe kredi de u Sankti Spiritu, de u sankti Eklesia, de u komuni ex panto sankti-pe, de u pardo de panto kako akti, de u re-vive de morta soma, e de holo-tem bio.  Es veri!

U-ci habe qo semani?
  Mi habe kredi; per auto puta alo elekti, mi ne pote kredi de Jesu Kristo, mi Kirio, alo kine ad An.
  Anti-co u Sankti Spiritu dona a mi u kla per info de Teo, e logi per pote, sti sankti e tena mi a veri fide.
  Per iso mode, An dona ad un holo Kristo Eklesia plu voka, kolekti, logi e sankti, e du tena id , e du tena id ko Jesu Kristo in mono veri fide.
  In u-ci Kristo Eklesia, panto-di e holo, An du dona a mi e panto kredi-pe pardo ab panto kako akti.
  Kron un Ultima Di, An fu sti re-vive mi e panto morta-pe, e re-dona a mi e panto kredi-pe de Kristo plu holo-tem bio.
  U-ci certe habe veri.