Saturday, June 6, 2015

Justi 2015 Pentecost

 / |_| \
|  (^)  |
|  (   ) |
 \_ ,,_/
    / \
  \__/   (avi Kolumba)

J  U  S  T  I

PER AN FILO

== 2015 == Di Penta-ze Festo (U festo de u Sankti Spiritu) ==



AKTI 1: 1 Veri, u proto atesti mi pa face tema panto ra, O Teofilo, Jesu proto akti e doci

 2 Ad u-la di, po komanda a plu ge-bali-pe, An pre elekti kausa u Sankti Spiritu.

 3 An pre monstra a mu vive Se, po An suferi per poli atesti, tem tetra-ze di gene vista de mu e dice u-la tema Teo regi landa.

 4 Po kolekti mu, An komanda; mu ne kine ab civita Jerusalem, sed: "Atende u Patri promise, vi audi ex Mi.

 5 "Veri, Johane pa bapti per aqa. Anti-co vi fu gene bapti per u Sankti Spiritu po oligo di."

 6 Veri, mu, po gene kolekti, qestio ad An, tem dice: "Kirio, qe, Tu nu re-neo u regi landa a natio Israel?"

 7 An dice a mu: "Ski plu kron alo tem, u Patri habe per Auto liabili, ne es de vi.

 8 "Anti-co vi fu gene dina, po u Sankti Spiritu veni epi vi. Vi fu es plu atesti-pe in civita Jerusalem e holo natio Juda, plus natio Samaria, e plus a maxi tele Geo."

 9 Po dice panto-la ra, tem mu vide, An gene leva. U nefo apo An ab mu oku.

10 Tem mu forti skope ad urani, e tem An kine, bi andro ko leuko vesti sta para mu.

11 Mu dice: "Panto Galilea andro, vi sta, tem vide urani, kausa qo? U-ci Jesu, Qi tali gene leva ab vi ad urani, fu veni per mode, vi vide; An kine ad urani."

12 Po-co mu re-kine a civita Jerusalem ab monti, ge-nimi Oliva, tele de u seti-di kine....

2: 1 Tem u celebra Di Penta-ze, panto mu kon homo tema es ad iso topo.

 2 Subito ex urani, u soni, homo u tako viole spira veni. Id sti ple un holo domi, topo mu sedi.

 3 Plu ge-skizo glosa homo piro gene vide a mu, e sedi epi panto mu.

 4 Panto mu gene ple per u Sankti Spiritu, e sti dice per plu hetero lingua, akorda u Spiritu dona a mu de dice.

 5 Pa es topo civita Jerusalem plu Juda-pe, qi du eko la, plu religio andro ex panto natio ex mu, qi es infra urani.

 6 Po u mu-dice de u-ci veni, u miria veni ad alelo, e gene konfusi, kausa panto audi per auto lingua; mu dice.

 7 Panto-pe este subito e mira, tem dice ad alelo: "Panto-pe, qi dice, es plu Galilea-pe, qe?

 8 Per qo mode na audi panto-pe per idio lingua, na gene nati topo?"...

13 Plu hetero pe, tem ridi, dice: "Mu es ple de neo vino."

14 Petro, tem sta ko mo-mo, sti voka, e dice a mu: "Panto Juda andro e Jerusalem eko-pe, atenta mi dice!

15 "Kausa ne es homo vi logi; plu-ci habe narko, kausa es un horo tri de di....

22 "Jesu- u Nazaret-pe, un Andro, Teo sti ski a vi per plu dina e mira e signa, Teo face per An meso vi, akorda vi ski,

23 "E Teo cede per ge-decide konsili e pre-ski, po gene kausa plu krimi manu- vi pa cide An per cide-ru.

24 "Teo sti; An re-leva, po laxa plu morti algo, kausa es no-posi, id pote tena An....

36 "Sura kausa-co holo natio Israel ski: Teo face u-ci Jesu, vi pa cide per kruci-ru, u Kirio e Kristo."



DE NORD DAKOTA

DENNIS WALAKER (1941-2014), U CEFA DE CIVITA FARGO

“Denny” gene nati anua 1941 in u civita Fargo, topo an fu gene es u civita cefa.  An pa akti plu stude in Nord Dakota Stato Universita.  An habe bi gema boteka in Fargo.  An plus gene u civita profesio de skema de plu sani de bi mega inter-stato via numera 94 e 29 in Fargo.  Anua 1989 an gene un ofici profesio de Publika Domi Ergo Krati-pe.

U-ci profesio habe in se u kura de plu krisi.  U civita Fargo es para u Rubi [Red] fluvi.  Anua 1997 po u neo maxi mega numera de nivi e blasto-tem pluvi, un in-unda kine a Fargo.  Walaker dona auxi de alexi Fargo anti id.  Anti oligo topo in Fargo ja gene u-la in-unda, plu Fargo civi habe u doxo, an pa boni akti.  Kausa-co, po an tenta gene u cefa ofici anua 2006, an gene plu maxi poli voti.

Anua 2009 u klu ma mega in-unda kine a civita Fargo (kron 200,000 eko-pe).  U natio krati dice a Walaker; an debi dice u komanda; panto civi kine ab Fargo.  Walaker dice no.  Vice-co an akti plu skema de oligo kilo volu-pe face plu arena-saka, e moti mu a plu risko topo.  Plu volu-pe reakti per face 3,000,000 saka.

Po-co Walaker dice: “Si na pa sio akti u lase de auto civita, u maxi mega mero de id gene in-unda.”  Walaker pa habe mega aktivi, tem ergo kon US Arme Ergo-pe-fa ex plu Tekno-pe, u Natio Krisi Krati Agenti-fa, e plu US Litora Guarda-pe.  Kron mono fo-severi kron, an nece dice u komanda; panto infanti e debili-pe kine ab civita.  An dice: “Pa es no-posi; mi sio dice a plu civi de civita Fargo, po panto ergo, mu pa face, mu nece lase id.”  Sura, oligo topo de Fargo pa gene in-unda.  Anti-co poli civi gene u doxo; an es un hero.

Un ami de Walaker dice: “Kon an u ra mono es famili.  U ra bi es Fargo, u ra tri es Fargo, u ra tetra es Fargo.”  An gene es u civita cefa po plu plus elekti de bi anua 2010 e 2014.  An es u membra de plu Civita Cefa anti plu no-Lega Fusili, u Civita Cefa Klima Alexi Centra, e plu Fili de Noria.  An gene morta 12-02 kausa rena kancera.

______________________________________
JUSTI es u gratis presa-ra.  Pe, qi volu u kopi alo panto-kron gene de id pote grafo a:

JUSTI is a free publication.  Anyone wanting a copy or subscription can write to:

GARY R MILLER
409 7TH AVE NW
MANDAN ND 58554-2522

Alo/or: gmillernd@gmail.com     glos-avanti.blogspot.com