Sunday, February 8, 2015

 /|_|\
| (^) |
| ( ) |
 \_"_/
  / \
 \__/ (avi kolumba)

J U S T I
PER AN FILO

== 2015 == Plu Algo de Kristo ==

MEMO? MEMO DE QO?

U memo-pote es un enigma ra. Freqe na habe u memo de u ra, na ne volu habe, e ne habe u memo de u ra, na volu habe.

U Kanta 22 habe u fine per plu-ci verba:

KANTA 22: 27 Panto munda fini fu habe plu memo, e tropi se a Kirio. Panto natio famili fu dona latri ante Tu.

U ra es qo, panto munda fini fu habe memo de? U Kanta 22 habe qo proto?

KANTA 22: 1 Mi Teo, mi Teo, Tu pa lase Mi kausa qo?

Plu-ci verba sti memo, kausa na Salva-pe Jesu Kristo itera dice mu, tem An du pende, po gene liga ad u kruci cide-ru tem di, kron An gene morta. Mu dice de u maxi mega solo, u Fili de Teo pa este, tem An habe solo, tem habe epi Se na kako. Plu-ci ne es plu ultima sti-memo verba in Kanta 22:

KANTA 22: 8 An habe fide de TEO. Lase; An sti salva An. Lase; An sti libe An, kausa An este hedo de An.

Plu-ci verba sti memo, kausa plu cefa sakrifice-pe, religio grafo-pe e konsili-pe pa forti dice mu anti Jesu (sti lekto de Mateo 27:42-43). Pe pote puta mu u simul acide, a-kron na Sufero Servi-pe dice u-ci deskribe de Se:

KANTA 22: 16 Plu kani pa kine peri Mi. U grega ex kako-pe pa presa kine peri Mi. 17 Mu pulsa akro-ma dia mi bi manu e pedi. Mi pote numera Mi panto osteo. Mu du skope e liga-oku a Mi. 18 Mu sti divide Mi vesti inter se. Mu bali plu fortuna de Mi vesti.
Es u feno; plu-ci verba veni ex Neo Akorda vice Paleo! U Kanta 22 ne simpli dice de plu humili ra, na Servi-pe de Teo pa du sufero. Anti-co id plus dice de minus-muta fide; Teo fu dona ad An salva.

KANTA 22: 22 Mi fu du deklara Tu nima a panto ko-pe. A meso de grega, Mi fu du dice a Tu latri.... 24 An akti ni mali-dice ni este mali de noku de plu ge-noku-pe. An ne sti kripti Auto facia ab An. Kron An sti voci ad An, An sti audi.

U ra es qo, panto demo de Geo fu habe memo de? U-ci es: U ge-sufero Servi-pe de Teo algo dice a na Kirio, e gene salva
Qe An gene salva? An pa gene morta! Veri! An sura pa gene morta. Anti-co An pa gene plus vive, tende na gene justi:

ROMA 4: 25 An pa gene dona kausa na krimi akti, e gene leva, tende dona a na justi.

Un ana-sta de Jesu ex panto morta-pe es homo na papira— na testi ra; panto na kako pa gene ple re-paga. Na habe justi kausa fide, po gene u judika “minus etio” ex Teo Auto per An dice.

Mi este sura; vi pa pre audi u-ci info. Boni, kausa An volu; vi dice id inter panto-pe. An volu; panto homi topo panto munda fini audi e du memo de plu ra, Teo pa akti per u-la cide-ru, e sti atenta ad An. Na Kirio volu; un holo munda gene logi; per cepti de u sakrifice de Jesu, e per salva de An ab morta, An sti salva panto kako-pe.

DE NORD DAKOTA

UN ALEXI-LO SAUERKRAUT

Wovoka pa es u Paiute Indiana, ge-nati cirka anua 1856 a nu-tem stato Nevada. An kresce ad u magika-an. Pe dice; u fusili ne pote cide an, plus an pote arki u meteo. Kron 1889-01-01, an habe u pre-sonia; si panto Indiana akti u Spiritu Kore, plu morta Indiana fu gene vive, plus plu bisona-bovi fu re-veni a landa. Plu hetero Indiana, maxi mega plu Lakota Indiana, esti kredi de an. Wovoka volu plu minus-viole akti, anti-co oligo Lakota dice de un itera milita anti plu ge-Uni Stato.

U civita Hebron de nu-tem Nord Dakota, gene establi anua 1885 ex bi Deutschland-pe ex Rosija, Charles Krauth e Ferdinand Leutz. Hebron debi es u loka pro auxi a plu neo eko-pe, e tende dona hidro a plu trena.

Kron 1890-11, plu Lakota topo u proxi Indiana reserva-lo Sta Petra akti u Spiritu Kore. U mu-dice gene veni; plu Lakota fu pote akti viole anti plu “Leuko-pe.” Poli kulti-pe sti fugi a mikro Hebron. Plu civi volu face un alexi-lo. Es zero dendro peri mu. Kausa-co mu face id ex gramini-tera— kon oligo feru-via taba, mu gene ab feru-via kompani. Mu face id tem simpli tri di! Mu dona ad id u nima Sauerkraut, Deutschland lingua semani “ge-konserva brasika,” qi pa es u ge-amo sito de plu civi.

U-la alexi-lo habe a meso u mega domi, tende tena plu gina e infanti. Peri id es un alexi mura de bi-metra alti. Peri u-ci mura es plu metali korda, ge-liga proxi a tera, tende sti; plu non-ami kade tem noktu. Anti-co plu civi tosto bali panto gina e infanti a civita Bismarck per trena.

Uno-di plu alexi-pe vide u nefo ex tera farina, qi kine a mu. Plu Indiana! Boni okasio, mu es plu Indiana ex u reserva-lo Berthold, qi plus volu milita anti plu Lakota.

Po oligo di, plu homi topo Hebron lose interese de u posi milita. Ko-co panto-pe re-kine ad auto domi. Anti-co plu Lakota itera akti u Spiritu Kore topo ge-Vulna-Genu Fluvi topo Sud Dakota. Kron 1890-12-29, plu USA milita-pe proto apo plu fusili-me ab plu Lakota. Mono Lakota-an no-volu dona auto fusili-me. Po-co u milita gene acide. Ma poli de 200 Lakota e oligo USA-pe gene morta. U milita gene u nima Wounded Creek Massacre [ge-Vulna-Genu Fluvi poli-cide].
____________________
JUSTI es u gratis presa-ra. Pe, qi volu u kopi alo u panto-kron gene de id, pote grafo a:
JUSTI is a free publication. Anyone wanting a copy or a subscription can write to:

GARY MILLER
409 7TH AVE NW
MANDAN ND 58554-2522
U S A

Alo/or glos-avanti.blogspot.com, alo-or gmillernd(a)gmail.com