Tuesday, December 25, 2012

The Nutcracker Ballet


U KORE "NUKI-FRAKTI-PE"

U NUKI-FRAKTI STORI



U kore "Nuki-Frakti" es kausa u stori "U Nuki-Frakti-pe e u Mus Regi"; ge-grafo ex E.T.A. Hoffman. Anti u ra; na vide epi skeni-lo nu-tem es difere de plu mikro ra de origi stori, u simpli skema es iso: U stori de u Deutschland ju-fe; qi habe u sonia de u Nuki-Frakti Regi An-Fili e de u severi milita anti u Mus Regi ko seti kefa.

Kron Marius Petipa pa habe un idea de face u stori u kore, id faktu gene basi ex u re-grafo ex Alexander Dumas, u boni ge-ski France grafo-an. An bibli ma mega monstra u ra; na nu amo-- u Nuki-Frakti kore.

U FESTA SKENI

Es u vespera pre Kristo-Nati in eko-do de famili Stahlbaum-- u mega e grandi domi ko maxi fo-kali Kristo-Nati dendro. U famili Stahlbaum es plu hospita de auto singu-anua Kristo-Nati festa, tem dice boni-veni, kron plu famili-pe e ami-pe kine a mu. Plu infanti, Klara e Fritz, akti plu kore e sporta, tem plus mu dice boni-veni ad auto plu ami.

Po u festa gene ma sti-hedo kausa musika e kore, vice-patri Drosselmeyer kine a mu. An es u tekno horo-me e sporta-ra face-pe, e panto-kron dona plu mira. Drosselmeyer sti atenta panto-pe, kron an monstra bi veri-mega pupa. Mu es u delekta ra de festa, tem bi mu gene u vice de kore.

Plu infanti proto aperi plu ge-volve doro, kron Drosselmeyer dona plu doro a Klara e Fritz. Anti u doro a Fritz es sub gluko, an dona a Klara u kali nuki-frakti-me; qi gene es u maxi sti-hedo ra de festa. Fritz este invidio, e, kausa habe ma spiritu de ju-an debi habe, rapi u nuki-frakti-me ab Klara, e subito frakti id. Klara este tristi, tem skope; Drosselmeyer tako repara u nuki-frakti-me per frika-te; an tira ex aero per magika.

Po u vespera gene es ma tardi, plu hospi kine ab la, e u famili Stahlbaum kron sto aktivi. Klara, tem este turba de auto ge-amo Nuki-Frakti-pe, kripti kine itera a dendro tende kura de an, e sti somni kon bi braki peri an.

U MILITA SKENI

Kron un horo-me soni noktu meso, plu no-norma ra gene acide. Klara proto gene es mei, tem u kali Kristo-Nati dendro feno kresce supra fe. Plu sporta-ra peri dendro gene vive, tem u kamera gene ple per un arme ex plu mus; ge-duce ex u severi Mus Regi. Po u Nuki-Frakti-pe gene vigi, an duce un arme ex plu sporta milita-pe anti plu mus. U Mus Regi kapti u Nuki-Frakti-pe, e sti u solo milita anti an. U Nuki-Frakti-pe feno es zero hero anti Mus Regi.

U Nuki-Frakti-pe kon arme ne pote dura, e gene rapi per plu Mus e Regi. Klara akti u fini risko dromo, e subito bali u noktu pedi-ve anti Mus Regi; qi bate an direkti topo kefa. U Mus Regi kade a pedi-lo. Plus-co plu mus akti u fugi, tem fero ab la u minus-vive soma de mus duce-pe.

U NIVI LANDA

U Nuki-Frakti-pe gene es u Regi an-Fili, e duce Klara per viagia a Nivi Landa, u magika mira landa topo silva; topo qi mu gene boni-veni ex plu kore nivi grana.

U SUKRO LANDA

U Regi Fili duce Klara a Sukro Landa; topo qi mu gene saluta ex Sukro-Prunus fe-Feri. U Regi Fili dice a fe de mu risko milita anti arme ex plu mus. Po-co fe dona a mu per u festa ko plu kore.

. Un Espana Kore
. Un Arabi Kore
. U Rosija Kore
. U Zhongguo Kore
. U Matri-Fili Kore
. U Kore ex plu Flori

Fini, u Sukro-Prunus fe-Feri e u Gentili-an akti u kali kore.

U SONIA GENE FINI

Klara gene vigi ab sonia, e detekti solo se topo Kristo-Nati dendro ko ge-amo Nuki-Frakti-me.

Sunday, December 9, 2012

Justi 2012 Christmas



 /|  _|\
| ||^| |
|  (   ) |
 \ _,,_/
    / \
  \__/ 


JUSTI

PER AN FILO

== 2012 == Kristo-Nati ==



Seqe es u krudi translati de infanti kanta ex Martin Luther:

1. Mi kin a ci ab alt urani, E fer a vi u neo info. Mi fer un info tali boni, Mi volu kant e dice de id.

2. U Babi gene nati a vi Ex virgo, Teo pa elekti—U Babi tali pov e mikro— E An fu gene es vi hedo.

3. An es na Cefa Krist e Teo, Qi volu duce vi ab minus. An volu salva panto homi, E apo panto kako akti.

4. An fer a panto vi un hedo, Patri-Teo pa prepara, Tende na in Regi landa Fu habe bio, holo-tem la.

5. Sti gene ski de panto sema: In nutri-va e babi vesti, Vi fu detekt: u Babi kumbe, Qi hab e tena holo munda.

6. Kausa-co na este hedo, E ko plu ovis-pe sti kine, Tende vide: Teo dona Auto karo Fili a na.

7. Mi Kardia, nu sti vide a la! In nutri-va qo-ra nu kumbe? Qo-pe es u-la kali Babi? An es u karo babi Jesu.

8. E boni-ven, gentili Babi! Tu vide zero kako akti, Sed kine a ci a mi in pove. Mi dice grati per qo mode?

9. O Krea-pe de holo geo, Kausa qo Tu gene pove, E kumbe epi la, gramini, U bovi e asinus vora?

10. E, si u geo es ma mega E ko ma mega val e kriso, Id sio hab excesi mikro, De es u babi kli pro Jesu.

11. Tu mol e mega-valu vesti Es simpli stra e babi tegu, In qi u grand e pluto Regi Nu es, id sio es Tu landa.

12. Kausa-co Tu este hedo De monstr a mi u veri info: Ja, panto munda ark e boni, Du dona a na zero valu.

13. Mi Karo-pe, mi Jesu, place Sti fac in mi u sankti kli, Tende somni in mi kardia-ka, E Tu memo panto-kron es in la.

14. Kausa-co mi este hedo, E salt, e kanta ko ple libe, E akti u-la somni kanta Ex kardia e per gluko soni:

15. A Teo glor in alt urani, Qi don a na Auto Fili, Tem u grega ex angeli kanta A na un hedo neo anua.


DE NORD DAKOTA

e de na

USS NORD DAKOTA (BB-29), u milita navi de klasi Delaware, es u proto navi de USA milita navi-fa, ge-nomina pro USA stato Nord Dakota.

U navi NORD DAKOTA proto gene stru 1907-12-16.  Id sti kine 1908-11-10.

1910-09-08 u navi gene un oleo-va explode ko piro topo mari.  Sixa navi-pe gene u Medali de Honora “kausa extra-ordinari hero akti tem profesio” tem piro.

Tem plu proto anua, u navi NORD DAKOTA ergo kon oceani Atlantika navi-fa de praxi longi est litora e mari Carribea.  Id kine 11-02 proto-kron trans oceani Atlantika, e visita England e France, pre praxi topo mari Carribea.  Bi termo-tem 1912 e 1913, id fero plu USA milita-navi akademi-pe de gene sko in Neo-England aqa.

Kausa plu Mexico politika turba pa akti anti plu relatio ko plu ge-Uni Stato, u navi NORD DAKOTA kine a civita Veracruz, a qi id kine 1914-04-26, penta di po USA mari-pe pa kine in civita.  Id kine longi Mexico litora tende alexi plu USA-pe ko mu habe-ra, a-kron u ma sekuri arki gene funktio, e, po u-la, kine a civita Norfolk, stato Virginia 10-16.  Un Atlantika navi-fa dona u klu ma severi sko programa tem milita menace.  U navi NORD DAKOTA es topo baia Chesapeake de kanona exercise, kron USA gene es u membra de Munda Milita Mono.  Tem holo milita, u navi NORD DAKOTA ergo topo fluvi York in stato Virginia e proxi a civita Neo York, tem dona plu sko a kanona-pe e tekno-pe pro ma mega navi-fa.

1919-11-13 id kine ab civita Norfolk tende fero ad auto landa u morta USA cefa Italia diplomati.  Tem es topo mari Mediterranea, id visita plu civita Athene, Konstantinople, Valencia e Gibraltar, pre kine itera a mari Carribea kausa plu singu-anua exercise.  Termo-tem de anua 1921, id es u membra de arme-e-navi bomba experi proxi a stato Virginia, tem qi plu navi FRANKFURT e OSTFRIESLAND gene merge tende monstra u posi de aeroplana milita.  Id sto plu navi-fa exercise seqe bi termo-tem, itera tende kine ko plu gene-sko navi-pe, e dona auxi a fu-tem dina de milita navi-fa per dona sko a plu fu-tem komanda-pe.  Tem viagia de anua 1923, id kine a Skandinavia, Scotland e Hispania.

U navi NORD DAKOTA gene u sto de servi topo civita Norfolk 1923-11-22 ko plu hetero milita navi kausa plu regula de Washington Milita-Navi Akorda.  Tem es ge-sti no-milita e gene u no-funktio klasi 1924-05-29, u navi NORD DAKOTA gene muta a moti-pote kanona-buta navi, e resta es de servi, a-kron u navi Utah gene vice anua 1930.  Id nomina gene apo ab milita-navi-fa lista 1931-01-07, e gene vendo a navi-stru kompani Uni topo civita Baltimore, stato Maryland 1931-03-16.  U moti-me gene funktio in navi NEVADA.

U modela de navi NORD DAKOTA gene monstra topo histori-do Nord-Dakota Geneti topo tera de cefa civita Bismarck, stato Nord Dakota.

U navi NORD DAKOTA (SSN-784) fu es u Virginia-klasi sub-mari navi.  Id es u navi bi de USA milita navi-fa, qi habe u nomina pro stato Nord Dakota.  U-ci navi es u proto ex plu submarine “Bloka III,” qi fu habe u neo ante e plu tekno-ra de klasi-Ohio misili “cruise.”  U nomina pa gene deklara 2008-07-15, e face gene proto 2012-05-11.

U navi insigni gene ofici 2012-08-24 ex sub-stato-cefa Drew Wrigley in Grandi Koridoro de cefa domi de stato Nord Dakota.  U fini insigni es u fini akti de grafo ergo, qi gene proto ex plu idea, plu navi ergo-pe dona, e ex plu Nord-Dakota civi, e habe u seqe de u sti-nota e forti simboli pikto.  USS NORD DAKOTA bombasti monstra u navi dice: “Forti ex tera, plu karpe-pe de bato-lo.”  

Trans id urani line pe pote detekti un umbra de USS NORTH DAKOTA mono (BB-29).

________________________________________

JUSTI es u gratis presa-ra. Ali-pe; qi volu u kopi alo u panto-kron gene de id, pote grafo a na:

 JUSTI is a free publication. Anyone wanting a copy or subscription can write to us:

 THE MILLERS |  409 7TH AVE NW | MANDAN ND 58554-2522 | U S A

Tu pote lekto ma poli topo glos-avanti.blogspot.com, alo grafo a na topo gmillernd(a)gmail.com.