Saturday, August 4, 2012

Justi, 2012 Trinity



       / | _ | \
      |  ||^ |  |
      |  |(  )  |
       \_  ,, _/
         /  \
        \___/
       (kolumba)
    _
    | _    _  ___ _
    | | | |_'  |  |
    | |_| ._|  |  |
  |_|  PER AN FILO


        _____
      /   _   \
     /_ (_ _) _\
    |( ( _|_ ) )|
    | - \ | / - |
     \( _\|/_ )/
      \ _____ /
(kruci, kardia, flori)




== 2012 == Tri-Unita (Triniti) ==






LA TRI-UNITA TEO DUCE NA A SALVA
u translati ex Luter-pe Formula de Konkordia


ROMA 11: 33 O, u profunda de plu pluto de sofi e ski de Teo! Komo no-logi es An plu judika, e An plu mode ultra ski! 34 Kausa qo-pe ski u menta de Teo? Alo Qo-pe es An konsili-pe?


Akorda-co na debi puta de un holo-tem elekti de Teo per Kristo, plus ne extra alo ne divide ab Kristo. Akorda u testi de sankti Paulus: na gene elekti per Kristo "pre u Geo funda gene establi" (Efesus 1:4), akorda grafo: "An filo na per ge-filo Pe" (Efesus 1:6). Un elekti gene monstra ex urani kausa plu ge-deklara Verba de Teo, kron na Patri dice: "U-ci es mi ge-filo Fili, per Qi Mi gene boni hedo. Sti audi ad An" (Lukas 3:22). Plus-co Kristo dice: "Sti kine a Mi, panto-pe, qi este plu gravi kargo. Ko-co Mi fu dona a vi kalma" (Mateus 11:28). Plus-co Kristo dice de Sankti Spiritu: "An fu dona a Mi glori" (Johanes 16:14), e re-memo a vi panto-ra, Mi pa dice a vi. Kausa-co un holo sankti Tri-Unita, Patri-Teo, Fili-Teo e Sankti Spiritu, direkti panto homi a Kristo, u-ci es, a Bibli de vive, per Qi mu debi cerka un holo-tem elekti de na Patri. Kausa na Patri deklara ex holo-tem: An volu salva pe kausa Kristo, homo sura Kristo dice: "Zero-pe kine a Patri excepti per Mi" (Johanes 14:6); e itera: "Mi es u porta. Si ali-pe kine in id per Mi, an fu gene salva" (Johanes 10:9). Kristo, "un origi Fili, Qi es intra na Patri" (Johanes 1:18), deklara u volu de na Patri, e per id na holo-tem elekti ad holo-tem vive, kron An dice: "U regi landa de Teo es proxi. Sti penite, e kredi de u Boni Info" (Markus 1:15); e itera kron An dice: "U-ci es u volu de na Patri: panto-pe, qi vide u Fili e kredi de An, fu habe holo-tem vive" (Johanes 6:40); e itera: "Teo tali filo u munda: An bali Auto origi Fili. Per-co panto-pe, qi kredi de An, ne fu gene morta, sed habe holo-tem vive" (Johanes 3:16).


Na Patri volu: panto homi audi u deklara e kine a Kristo. Plus-co, akorda Auto promise, Kristo ne fu direkti mu ab Se: "Mi ne fu bali ab Mi pe, qi kine a Mi" (Johanes 6:37). Tende na pote kine a Kristo, Sankti Spiritu krea u veri fide per audi plu Verba de Teo, homo u bali-pe testi: "U fide veni ex audi plu Verba de Teo" (Roma 10:17), kron id gene dice per honesti e veri. Kausa-co zero-pe, qi volu gene salva, debi sti turba alo tortu se per plu puta de plu kripti konsili de Teo, si an pre gene elekti e bali ad holo-tem vive. Per plu tali puta, u sti-turba konsili-pe more tenta sti: na akti kako; e sti turba in Kristo-pe. Anti-co mu debi audi Kristo, Qi es u "Bibli de vive" e de un holo-tem elekti de panto fili de Teo ad holo-tem vive, e Qi testi a panto homi ko justi: Teo volu: panto homi, qi este u gravi kargo ex auto kako akti anti Teo, sti kine ad An, e detekti u re-vive e gene salva.


Akorda u sko de Kristo, na debi sto plu kako akti anti Teo, este penite, e kredi de An promise, e ple e holo fide per An. Plus-co, kausa na ne pote akti u-ci per auto pote, Sankti Spiritu volu sti tali penite e fide in na per plu Verba de Teo e bi sankti ritu [Bapti e Vora de na Cefa]. Plus-co, tende na pote logi u-ci e resta e dura per id, na debi petitio a Teo de dona a na An filo, de qi An sti sura na per sankti Bapti ritu, e ne debi dubi: akorda Auto promise, An fu dona id a na. Na habe An promise: "Qo patri inter vi... si an fili petitio de piski, sio dona ad an u serpenti vice piski? Alo si an petitio de ova, sio dona ad an u skorpio? Per-co, si vi, qi es kako, ski u mode de dona plu boni dona-ra a vi plu infanti, na urani Patri fu tali ma boni dona u Sankti Spiritu a mu, qi petitio ad An?" (Lukas 11:11-13).






DE NORD DAKOTA
e de na


PLU SEQE-RA DE NORD DAKOTA PETROLEA MA-MEGA


Topo plu ge-Uni Stato de Amerika, plu neo tekno lase: plu homi nu pote tele horizo fora tende gene petrolea. Plu mega muta pa gene acide topo plu uest mero de Nord Dakota:


Es plu turba de hidro no-puri. 2000 kargo-vagona kon hidro es nece de face u neo petrolea fonta. Es ma poli de 300 fonta topo Nord Dakota.


Es u minus de eko-lo. Plu preci de eko-lo nu es ma mega per penta. Poli homi nu eko in plu vagona-domi, qi debi es pro plu viagia-pe. Poli homi tenta eko in plu boteka vagona-lo. Plu polica nece apo mu. Kausa-co proxi panto kulti-pe habe tri vagona-domi epi kulti-lo, e gene mega valuta kausa eko-paga. Plu hoteli es ple, plus u kamera preci es ma mega per bi.


U pusi civita Williston nu vendo ma poli ra de panto Nord Dakota civita. U mega boteka Walmart in civita Williston habe u minus de ergo-pe. Mu ne pote moti plu vendo-ra a vendo pla, sed simpli kumu mu epi pedi-lo. U vora-do McDonald's topo Williston dona $500 a pe simpli de proto ergo in id. Poli vora-do ne pote gene sufici numera ergo-pe. Kausa-co es zero servi topo mu tabla- mu dona plu vora-ma a merka-pe, poste plu merka-pe fero id ad eko-lo.


U civita Minot habe plu homo turba. Id nu-pa habe u mega in-unda, qi destru plu hekto domi. Id nu habe plus 9000 eko-pe.


Plu vagona mali acide es ma poli kausa ma poli kargo vagona. Poli vagona-pe nece apo plu vagona a civita Bismarck tende gene repara.


Plu karcera topo Williston area nu habe plu karcera-pe per bi. Plu karcera-pe, qi debi dona u libe paga, freqe paga per imedia valuta.


Plu polica-pe es ma poli per bi. Plu neo polica-pe freqe gene neo ergo topo petrolea-lo. Kausa-co u polica arki tenta merka plu vagona-domi tende gene ma poli polica-pe. U maxi poli anti-lega-ra es plu pugna in plu alkoholi-do. Plu nudi-gina-do bali plu bus a plu petrolea-lo, tende fero plu andro a mu. Mali uti de narko-ma es ma mega. Plu polica-pe rapi plu narko vagona-pe klu tem matina. Kausa es poli neo eko-pe, plu narko-pe kine in no-korekti eko-do es u turba.
________________________________________
JUSTI es u gratis presa-ra. Ali-pe; qi volu u kopi alo u panto-kron gene de id, pote grafo a na:
 JUSTI is a free publication. Anyone wanting a copy or subscription can write to us:


 THE MILLERS
 409 7TH AVE NW 
 MANDAN ND 58554-2522
 U S A


Tu pote lekto ma poli topo glos-avanti.blogspot.com, alo grafo a na topo gmillernd(a)gmail.com.


No comments:

Post a Comment