Saturday, June 2, 2012

Justi 2012 Pentecost



       / | _ | \
      |  ||^ |  |
      |  |(  )  |
       \_  ,, _/
         /  \
        \___/
       (kolumba)
    _
    | _    _  ___ _
    | | | |_'  |  |
    | |_| ._|  |  |
  |_|  PER AN FILO


        _____
      /   _   \
     /_ (_ _) _\
    |( ( _|_ ) )|
    | - \ | / - |
     \( _\|/_ )/
      \ _____ /
(kruci, kardia, flori)




== 2012 == U Penta-ze Di Festa (u veni de Sankti Spiritu) ==


(Vice u Penta-ze Di Festa Tema, na grafo tende reakti a bi qestio ex lekto-pe ex Cuba.)


MARTIN LUTHER- RE-FORMA-PE


500 anua po tem de Kristo, u Kristo-pe grega du kresce anti plu kako akti ex plu falsi doce-pe. Po-co u Mohamed arme gene plu vikto topo nord Afrika, Palestina, Siria e Asia peninsula. Topo uest Europa, u preka-pe duce topo civita Roma gene es u cefa de Kristo-pe grega. An gene u nomina "Papa," e deklara; Kristo elekti an tende habe un arki supra panto-pe, klu plu regi. U Kristo-pe Re-Forma gene es nece, tende re-sti importa u Kristo-Bibli, e tende re-sti u veri de salva ab holo-tem morta.


Anua 1483 (nona anua pre Kolumbus detekti u kontinenta Nord Amerika), Luther gene nati topo pusi civita Eisleben, Deutschland. Kron Luther habe 14 anua, an nece kine ab auto eko-do, tende dura gene plu sko. Po-co u patri de Luther habe sufici valuta de paga u mero de plu sko de Luther. Kausa-co an kine ad universita topo civita Erfurt.


Anti-co Luther ne este hedo. Tem an infanti, bi parenta pa dona ad un eduka de dice plu preka a plu "sankti-pe," e este honora de Papa de Roma Universa Kristo-pe Grega, e sti plu "boni akti." Tende tenta detekti u paci pro psiko, an decide kine a monako (religio fratri)-lo, e es u monako.


U doci-pe Staupitz, u monako-lo duce, decide bali Luther a civita Wittenberg, tende sti prepara an de doci de u Kristo-Bibli topo neo universita; un elekti-pe (duce-pe) de landa Saxoni pa establi. Tem Luther es topo monako-lo, Staupitz pa dice a Luther; an pote detekti u paci; an cerka, solo per Jesu. Luther tosto gene u merito de boni doci-pe. An deklara; u pardo ab panto kako akti es u gratis doro; Teo dona a na, u seqe-ra ex panto-ra; na Salva-pe pa akti pro na.


U "neo" doci ex Luther; qi faktu es u re-gene de plu simpli veri ex Teo bibli, ne sti plu mega turba pre anua 1517. Tende gene sufici valuta de face u religio-do de sankti Petro topo civita Roma, u Papa lice plu vendo de plu pardo papira topo holo Deutschland. Luther grafo 95 tema per lingua Latino; qi monstra; plu vendo de plu papira es anti Kristo-Bibli. Papa komanda; Luther kine a Roma tende reakti de etio de plu falsi doci. U duce-pe de Luther; u Saxoni elekti-pe, uti arki tende sugesti; pe tenta korekti plu turba ex Luther vice topo Deutschland.


Anua 1518, Luther reakti ante religio cefa Kajetan; Papa pa bali iso u representa-pe. Kajetan komanda; Luther deklara; plu doci-ra es falsi. Po mono anua tem publika disputa ko Deutschland Kristo-religio tekno-pe ko nomina doci-pe Eck, Luther deklara; pe ne nece obe akorda Papa tende gene salva ab holo-tem morta.


Anua 1521, un imperi cefa Karolus komanda; Luther kine ad unio ex plu Deutschland arki-pe ko nomina plu Konsili-pe de civita Worms. Un imperi cefa dice a Luther; an ne volu audi plu alexi de plu Kristo-Bibli doci-ra, sed simpli u konfesi ex Luther; plu doci-ra es falsi. Po puta ko plu preka de reakti mono di, Luther dice: "Si pe ne pote monstra per Kristo-Bibli; mi pa akti plu falsi dice, mi pote deni alo fu deni zero."


Kausa u deni de Luther, un imperi cefa dice; an es u krimi-pe; ali-pe pote cide po 20 di. Anti-co un elekti-pe Frederik akti u salva de Luther per "klepto" an, e duce an a solo alexi-lo ko nomina Wartburg. Tem-co an translati u Kristo-Bibli Neo Testi a Deutschland lingua, tende panto Deutschland civi pote lekto plu dice de Teo.


Luther pote re-kine a civita Wittenberg anua 1522, kausa Teo sti aktivi un imperi cefa Karolus per severi turba topo plu hetero mero de imperi landa. Luther freqe dona plu sko topo Wittenberg universita e in id religio-do. Kron di 18 de meno-bi, 1546, Luther lose bio.


DE NORD DAKOTA
e de na


RABI EQUS (TchascUnka WitkO, 1849?-1877)


Tem gene celebra kausa severi tem milita, Rabi Equs gene u boni ski inter auto demo de es u cefa ko fu-tem sonia; qi dona se tende tena plu more de Lakota kultura.


Klu iso juve andro, Rabi Equs habe u boni histori de milita-pe. An pa klepto plu equs ab plu Indiana Korvus pre an habe 13 anua, e duce u milita grega pre habe 20. Rabi Equs akti de u 1865-1868 milita; ge-duce per Oglala cefa Rubi Nefo anti plu USA proto-pe topo nu-tem Wyoming. Plus-co an importa akti de cide plu soldata topo alexi-lo Kearny anua 1867.


Rabi Equs gene u boni histori inter plu Lakota plus per tena plu more de auto demo. An deni; ali-pe gene u fotografo de an.


Po USA Milita Mero komanda; panto Lakota kine ad auto reserva-lo anua 1876, Rabi Equs es u duce-pe de plu anti-pe. U forti ami de plu Indian Cheyenne kausa game a Cheyenne gina, an kolekti a se u milita grega ex 1200 Oglala e Cheyenne topo auto viki, e sti; generali Crook fugi di 17 de meno-sixa, 1876, tem Crook tenta kine ultra fluvi Rosa Blasto a tem-lo topo plu monti Pusi Mega Kerati de Indiana cefa Sedi An-Bisona. Po-co an milita ko Sedi An-Bisona, e kron di 25 duce an grega, tende destru plu equs milita-pe de Custer.


Po u vikto, plu Indiana cefa sti fugi. Anti-co Rabi Equs du resta, tende milita anti generali Miles, tem an minus-sto kine seqe plu Lakota ko plu ko-pe u frigi-tem de bi anua 1876-1877. U-la kon u minus de bisona karni nece; Rabi Equs cede se di 6 de meno-penta de anua 1877.


Klu po no-vikto, Rabi Equs du habe u libe psiko. Tem meno-nona de anua 1877, an kine ab reserva-lo minus lice, tende duce u pato sponsa a bi parenta. Generali Crook komanda; Rabi Equs gene rapi, kausa an este u fobo; an re-kine tende milita. Tem proto, Rabi Equs ne akti anti rapi. Anti-co, po an este u ski; an gene duce a karcera, an tenta fugi. Tem u  milita-pe tena an bi braki, un hetero milita pulsa u pafili daga-ru in abdomena. Rabi Equs morta po oligo horo.


Tende dona ad an plu honora, bi cefa via in USA habe an nomina, e u fo-mega statu de an gene seka ex u monti; qi es proxi a famo monti Rushmore. (Sti vide www.crazyhorsememorial.com)


________________________________________
JUSTI es u gratis presa-ra. Ali-pe; qi volu u kopi alo u panto-kron gene de id, pote grafo a na:
 JUSTI is a free publication. Anyone wanting a copy or subscription can write to us:
 THE MILLERS
 409 7TH AVE NW 
 MANDAN ND 58554-2522
 U S A


Tu pote lekto ma poli topo glos-avanti.blogspot.com, alo grafo a na topo gmillernd(a)mail.com.


No comments:

Post a Comment