Saturday, February 26, 2011

Justi 2011 Lent

U JU-OVIS KINE AD ANTE MINUS PROTESTA

Tem tu es un infanti, qe tu pa gene puni
kausa uno-ra; tu ne pa akti?

Maxi posi, si tu pa gene u puni kausa un
hetero-pe, u-la pe sta proxi tu, tem tu
gene u puni kausa u kako akti. Anti-co
tu protesta. Na volu zero puni, idio
puni; na ne merito!

U lega-fa ex Teo nu deklara un exakti
ra; na merito:

ISAIA 53: 6 Panto na, homo plu ju-ovis,
pa kine ad ero. Na, panto-pe, pa tropi
se akorda auto volu...

U Kristo-Bibli kanta-pe dice tali:

KANTA 53: 3 Panto ex mu pa tropi a latu.
Panto mu pa gene es kako. Es zero-pe; qi
akti boni, no, ne mono.

Ko-co na gene inklude in panto-ci forti
deklara de etio, qe? Es na; qi merito
puni. Plus-co u-ci puni es morta, iso
Teo Lega deklara:

EZEKIEL 18: 4 U psiko; qi akti kako, fu
gene morta.

Anti u Lega komanda u puni kausa kako,
ne es u volu de Teo; na gene tali puni.
Ka-co, kausa no-merita amo pro plu kako
e anti-krati homi:

GALATI 4: 4 Teo pa bali Auto Fili,
ge-nati ex gina, ge-nati sub plu Lega,
te re-merka mu; qi es sub la Lega.
Per-co na gene es An plu fili.

An volu puni Auto Fili vice na--dona ad
An plu kako akti de panto na, te na gene
salva ab kako e holo-tem morta. Klu
plus-co An volu; na gene holo-tem bio,
iso ge-grafo:

JOHANES 3: 16 Teo tali amo holo munda;
An dona Auto veri Fili, te ali-pe; qi
kredi de An, ne fu morta, sed gene
holo-tem bio.

Qe u Fili de Teo protesta de etio? Holo
no!

ISAIA 53: 7 ...An gene opresi, plus-co
An gene algo. Anti-co An ne aperi u
stoma. Homo u ju-ovis; qi pe duce a
karni-lo, e homo un Ovis; qi es ante plu
lana-pe, es silento, An ne aperi u
stoma.

An zero-kron pa aperi u stoma, excepti
te deklara u veri ante plu anti-pe. An
zero-kron evita suferi.

Iso parenta, qe tu volu auto fili gene
puni kausa uno-ra; un hetero-pe pa akti?

ROMA 5: 7 Kausa pe no-freqe morta vice u
justi homi--anti pe no-freqe posi volu
morta pro u boni-pe. Anti-co Teo monstra
amo pro na per u-ci: Klu tem na ankora
es plu kako-pe, Kristo pa morta pro na.
Ka-co, kausa na gene justi per An hema,
na klu gene salva per An ab Teo koleri.

U reakti kausa tali no-merito amo e
holo-tem salva fu es grati ex plu homi;
pro qi u Fili pa sakrifice Se. Kausa u
sakrifice de Jesu vice de na, kron na
sta ante u regi-lo de Teo, na ne fu
atende puni. Vice-co na fu atende u
deklara:

MATEUS 25: 34 Sti veni, vi, ge-bene ex
Mi Patri, e geneti gene u regi landa,
ge-prepara pro vi kron proto de munda.

No comments:

Post a Comment