Saturday, December 25, 2010

LOKOTENENTE PLU

LOKOTENENTA-BI PLU



ex Jurij Tinjanov

ge-translati, ge-brevi e ge-adapta ex Gary Miller



Lokotenenta-bi Plu (per Rosija lingua lokotenta-bi "Kije") pa gene ge-presa in anua 1928. Id es u stori de u maxi ge-amo tema de Rosija grafo-pe "u pusi-homi", u-ci es u norma homi; qi subito detekti se in no-norma stato. Kausa id gene ge-grafo tem komunismo, id plus dona nara de fatuo de plu Rosija regi. U Rosija musika-pe Prokofjev pa amo e pa grafo un opera de u-ci stori. Kausa an pa adi u viagia trans nivi in trojka, u glisa-vagona ge-trakto per tri Equs, id nu es homo u neo-anua alo "Kristo-nati-tem" stori in Rosija. --Gary



Un imperi pa du somni para ge-aperi fenestra. Tem horo po vora, tem sito akti lukta ko soma, ali-ra; qi sto somni, es ge-veto. Tem sedi in sedi-mo kon alti dorsa e ko vitri skuta epi tri latu, an du somni tem habe un usuali po-vora sonia.

Subito, an sti sedi kon ple ge-aperi oku, tem vide ex fenestra de palati e tem sto spira kausa sito e kausa non-interese.

Infra fenestra uno-pe fo-soni dice "Auxi!".



Topo ofici, u milita ofici-pe pa gene puni e pa gene bali a nivi landa.

U nova ofici-pe-- nu tali juve-- sedi para tabla tem grafo. An manu du seiso, ka an habe po-kron. An debi face ge-fini u kopi de plu komanda a milita grupa de an kron exakti sixa horo, so u milita auxi-pe de u-ci tem fu posi fero id a palati, topo, po moti simul ko plu hetero kopi iso id, u milita auxi-pe de imperi fu posi dona id ad an kron nona horo. Po-kron es u krimi.

An pa face bi ero: an pa grafo; lokotenenta Cianosis es morta, plus vice grafo "Plu lokotenenta-bi es plu guarda..." an pa grafo "Lokotenenta-bi Plu es guarda..." Ka-co, kron u sistema-pe veni kausa u reporta pro milita auxi-pe, u-ci ofici-pe tako vide un horo-me e tensio ad an u papira ko lokotenenta-bi Plu.

Kron exakti horo nona, u kampani face soni in palati. Un imperi pa tira id korda. Kron exakti horo nona, u milita auxi-pe de imperi kine in kon usuali reporta ad imperi.

Un imperi es koleri. Tem holo pa-di, zero-pe pa detekti; qo-pe pa fo-soni dice "Auxi" infra fenestra. Un imperi grafo: "Lokotenenta-bi Plu a guarda ergo."

Po gene u-ci komanda, u milita komanda-pe puta mega-tem tem tenta sti u memo; qo lokotenenta habe u xeno nima Plu. An imedia prende u lista de panto milita arki-pe in u-la milita grupa, anti-co zero arki-pe ko talo nima gene detekti.



Plu nece-fa de lokotenenta-bi Cianosis es minus makula panto-tem. Tem plu komanda gene lekto a milita grupa de an, Cianosis sta homo more: perfekti orto tem puta de nuli-ra.

Subito, an audi auto nima. "Moti u nima de lokotenenta Cianosis a lista de morta-pe." Ci-kron u komanda-pe, po lekto u komanda, sti vide minus puta a loko, topo Cianosis sta panto-tem. An lase; u papira kade. Cianosis gene ski; plu-ci verba es de an.

Ko-co, kron an kine kon auto vice, an proto dubi; an es vive. Feno, an dura vive kausa un ero in komanda. An face ruina de panto marca exercise, kausa an sta homo pali epi kampo. An ne puta de kine.



U milita auxi-pe kine kon auto-fide.

"Sinior Imperi: lokotenenta-bi Plu pa fo-soni dice 'Auxi'."

"Sti qestio tem kon an e, po uti flagela anti, bali an per pedi a nivi landa homo puni." Per u-ci mode, u bio de lokotenenta-bi Plu gene proto.

Po nu, u flagela e un iti a nivi landa es u mero de an persona. U komanda fu nece gene akti.



Un imperi pa face dulo plu milita e landa arki-pe. Qo-ka? An este mega vaku peri se. Panto-lo peri an es anti-krati e vaku. An feno un andro minus ge-ski-pe e minus relatio-pe. An esce u mega amo-pe de natura, ko-co an volu u versi de amo de panto-pe alo de ali-pe. An tensio manu a grafo-ru: "Lokotenenta-bi Plu; ge-bali a nivi landa, debi kine versi e es u lokotenenta-mo e gene game ko gino ex palati." Po lokotenenta Plu ki versi ex nivi landa, poli homi habe ski de an. An es u-la lokotenenta; qi pa fo-soni dice "Auxi" infra fenestra de imperi, e qi pa gene puni e gene bali a nivi landa e po-co gene pardo e es u lokotenenta-mo. Tem vide trans lista de milita grupa, uno-kron un imperi detekti u nomina lokotenenta Plu per acide e dona ad an u titula kapitana, plus-co hetero-kron kolonelo.

An nu habe arki supra holo milita grupa.



Poli homi habe memo de fune ritu de milita-cefa Plu mega-tem.

U milita grupa akti marca ko poli insigni-te. Tri-ze vagona ki poste. Un imperi pa dona komanda de u-ci. Plu milita premi-insigni gene fero epi kosina. Poste u bari morta-va, u sponsa de an kine tem duce un infanti.

Fe habe lakrima.

Kron u ritu grega kine ante palati, un imperi kine a tira-ponti ko lento te skope, ko-co an dona saluta per gladia. "Plu maxi boni homi de mi du morta."

Po u fini vagona ki ultra, an dice u cita per Latino: "SIC TRANSIT GLORIA MUNDI."

No comments:

Post a Comment